الدولار والجنيه

يا للي رفعت الدولار
علم أمريكا على أرضك
جنيهنا بيه إتنكس
علم الوطن عرضك
أرضك وعرضك......
وقلة وقفته في مرضك
إدعي ع اللي السبب
في السنة وف فرضك
______
إضرب جنيهك بالجزمه
وقوله حطتنا ف أزمه
إنت اللي خيبت وذلتنا
ومالكش في العالم لزمه
_______
أصلك ورق ومالكش رصيد
خلتنا وسط الخلق عبيد
ناقص وسعرك في النازل
وكل أعداءك بتزيد
_______
يا معلقين الوطن
في البورصة من رجليه
إسم الدبيحة وطن
والكيلو فيه بجنيه
طلب الدولار خمسة كيلو
والباقي قال بقشيش
للي بيقرا الفتحة
واللي يسمي عليه

______
دافع ياخايب عن نفسك
وقلنا مين بشجاعه
مين اللي كابس على نفسك
ولخيبته عاملك شماعه
______
سمعنا صوتك وإتكلم
ولا انت في الأزمه تبلم
وأما الدولار بيبصبصلك
بتسيب له دقنك وتسلم
______
خلوك لا تسوى ولا تساوي
وإستوردولك عشماوي
في الإنفتاح اللي بلانا
وجاب لنا مليون حاوي
______
دا إنت اللي كان الإسترليني
بالقطن بيقبل إيدك
ساعة ما كنت بتتأنزح
والكل في البورصة عبيدك
______
دلوقتي سعرك في البورصه
ما يجبش للعيل قرصه
وإنت اللي قلة مقدارك
مش مدي للواحد فرصه

______
شفت بعيني الدولار
بيساوي تسعين قرش
أيام ماكان الجنيه
في البورصه باشا بكرش
قبل مايصبح بساريا
في بحر إفلاسنا
وإبن الحرامى الدولار
في البحر سمكة قرش
______
كان الجنيه المصراوي
يسوى الجنيه الإسترليني
قبل ما يركع ويولول
ويقوله حقك على عيني
______
إوعي الدولار دا يوطيها
قيمتك وفي البورصه يعاكسك
والإنفتاح الإستهلاكي
بالأمر يكبس على نفسك
______
بكره الريال هيبهدلنا
ودا اللي كان يوم خدامك
من يوم ماشافك بتكسكس
وهو طالع قدامك
______
ما هي المصيبه إنك روحي
والزنقه بتطلع روحي
وسعرك النازل دايماً
في البورصه بيهد طموحي

______
يا جنيه لا قاعد ولا بتقوم
ولا ناوي حتى تبطل نوم
بخبتك اللي ما ليها مثيل
خلتنا طول العمر نصوم

وإن صومنا بكره حنعمل ايه
يا جنيه قربنا نبكي عليه
بيحقروك في العالم ليه
ويحقرونا يا عيب الشوم

ملعون أبوك وأبو اللي جابوك
وأبو اللي خلاهم سرقوك
وبلبصونا وقلعونا
وغرقونا عشان ما تعوم
______
ملعون أبوك أندل مخلوق
معدتش ليك لازمه ولا سوق
يغمى عليك وفي يوم ما تفوق
ما تيجي إلا على المظلوم
______
وحياة أبوك بطل تلطيش
وسيبنا ويا فراخنا نعيش
دا انت اللي سعرك قالوا ما فيش
والضرب فوق راسك بالشوم

______
ياجنيه في إيد الغلابه
أسطى ومتصيت
وف إيد ولاد الديابه
طفل بيعيط
قول لوزير الزراعه
قطننا راح فين
لاجل ما ترجع كبير
البورصه وتزيط

ولا انت عاجبك كده
يضحوا بيك على طول
يغذوا فيك الأبالسه ...
بأنبوبة المحلول

اللي لا تنفع ولا تشفع
عشان ماتطول
تجيب لعيل صغير
وقع من طوله
شقة فول

صعبان عليه وقوفك
في الشتا عريان
رجليك بتخبط في بعضها
في ليل بردان
لحد عنده حطب عشان يدفيها
ولا فرن حامي
يدفي القاعده زي زمان