عنبر المبتسرين

عنبر المبتسرين
في عنبر سته مبتسرين
يساووا دولار
لقيت حضانه ....
فيها جنيه
نزل ناقص ....
بستين قرش
وبيقولوا
نزل مخنوق
وحاولوا فيه
عشان ما يفوق
وأهله سابوه
بتوع جمعية الأيتام
خدوه وراعوه
ولما إتأكدوا
إنه يتيم
أهم كفلوه
وبيغذوه
بأنبوبه
عليها كلمة إستثمار
ونط عليه من الشباك
قليل الأصل
إسمه دولار
قطع أنبوبة المحلول
وسابه يموت

وهو ماشي
في جنازته هناك
وأهله
كلهم عارفين
ومش قادرين
يقولوا بم
وبيقولوا
إنتحر بالسم
ورحمه ونور
عليك ياجنيه
--------------
قالوا نعالج سيادته
بأجهزة تعويض
تشد حيله وتدفع
ميته ويفيض
وقع صاحبنا وأتاري
الدم صار ميه
لا ينفع الطب في حالته
ولا التمريض

قالوا ندخّل سيادته
غرفة الإنعاش
يمكن يعوض علينا
ربنا لو عاش
أتاري حالته عدم
والحاله معروفه
جابوا الدولار يفصله
قال البعيد ببلاش

الأهل قالوا ادفنه
وعوضنا فيه لله
ما لقينا حتى كفن
يرضى يخش معاه
وسمعنا في التربه ميت
لما شاف حالته
صحي ومن حرقته
صعب عليه قال آه

» عنبر المبتسرين