خيرك لغيرك

يا مصر ياللي خيرك لغيرك
الجرن فاضي موسم حصادك
القطن فينه والقمح فينه
خللي الدولار دا يركع قصادك
كنت البريمو من قبل فكر اللي
بالي بالك ماجه وصادك
وآد إنتي يا امه بإسم الفراوله
والكنتلوب ضاع إقتصادك

يامصر ياللي كنت بتدي
ليه النهارده بتمدي إيدك
كان يوم ما نجمع القطن فيكي
من كل حاجه يكتر رصيدك
الواد يقدم الشبكه ليكي
وإسكندرية تخطب صعيدك
لاحد يقدر يضحك عليكي
ولا برغيفه يقدر يصيدك

يامصر ليه الجنيه بتاعنا
في كل حته فاقد رصيده
لاقطن فيكي يغطي قيمته
ولا قمح جاي موسم حصيده
ولا اللي يقدر يخلي شاعر
بكف قمح ....يخبز قصيده
دا لو ماكنش خايف لواحد
من اللي همه...عايز يصيده


يامصر ياام الأحبه فوقي
وغطي نفسك بأي حاجه
سيبك من اللي عاوزك تجيبي
أكلك وشربك من الخواجه
دا انت اللي نيلك وشد حيلك
يقولك إنك من السذاجه
إنك ياغاليه تستورد لنا
من البلاوي حتى الدجاجه