ماتش وجوووول

موضوع: ماتش وجوووول الأحد مايو 06, 2012 1:15 pm

ماتـــش
ياأمة جولك المفتوح
وشبكة جولك
الدابيه اللي مقطوعه
وكل اللي
يشوط فيها
ويحرز جول
وأهلك قاعده بتشجع
ومخدوعه
عنيها حول
بقالها سنين
لاعارفه إيه بيتسجل
ولا عارفه
اللي سجل مين

وخط هجومك الساقع
بيدي الكوره لخصومك
وخط دفاعك الواقع
بيتآمر علي نومك
وياما جبنا لعيبه
لخط الوسط هليبه
وبعد كل ترقيصه
بتترقصها بتهلل
بسوء الأرض تتعلل
وواحد من بني أهلك
يذيع الماتش ويحلل
لحد البول
ويزعق لما ييجي جول

وويا الضغط
من خصمك
وكل ما أحاول أعملها
وأقول أتحر ونسجل
ألاقي الرف رافع الرايه
وبيعلن بأن حقيقي
متسلل
يشوط الكوره لعبيهم
وخط الوسط سايبهم
يسجلوا جول
وناخد الكوره ونسنتر
ونتقنطر
ونفسي في هجمه مرتده
نسجل جول
______
عم أكتوبر سلامتك
السنه دي
إزيّ حالك؟
الدكاتره بيقولولنا
الضغط جالك
واللي صابك
صاب عيالك والعرب
وأجدع مافيهم
كلهم خيب آمالك
واللي في فلسطين
دا حاصل
قسوته فوق احتمالك
واللي فوق حدك
فـ غزه
منظره شوه جمالك
واللي حاصل
في العراق ده عمره
مايسيبك في حالك
دا ان ماكنشي
في كل حاجة
تقرفك
بالغصب جالك

______
عم يوليو
من بلدنا
كان كبيرها
وفيها تاه
قالوا عقله
طار صوابه
م اللي
بيشوفه ولقاه
حد شافشي
عم يوليو
فيه كتير
بيقولوا يوليو
تاه في يونيو
أو في أكتوبر
تخفي
لجل مايقدر يعيش
فيه كتير
بيقولوا يوليو
شافله شغله
في العريش
وأما قامت
الإنتفاضه
قال دي فرصه
لجل أعيش

______
عمتي المسكينه
سينا
أعذرينا
كلنا مضحوك علينا
إنتي واحنا
ونصر أكتوبر
أسيرك
اللي دافنينه
بإيدينا
بناديلك
كلنا مسيرنا
نجيلك
بس وحياة اللي ضحوا
وبدموع القلب سحوا
ماتكونيش
روحتي مارينا
والمصيبه منا فينا