ياللي هواكي انخلق

ياللي هواكي انخلق
قبل الزمن فيّه
ياللي قتيلك مالهش
في شرعتك ديه
أنا إللي ماسك في طوقك
غصب عن عينى
و أنا إللي ميت في حبك
وتجيبنى الملاغية
صدقوا اللي قالوا عليكي
يا مصر قتاله
تضحي ياللي يحبك
وانتى مختاله
بنظرة منك بترسي
كل أحبابك
واحنا ف عز البنا
من أعلي سقاله
والدور يا مهرة عليّ
والهوى حاله
هيه دى عادتك
يا حلوة ولا شارياها
نلقي ف حضنك
شوارع سد ومتاهة
واما بنسأل شوارعك
عن حوار لكي
يقولونا مصر القديمة
البت إياها
تشهد عليّ ياست الكل حبتياتى
إن العذاب ده ف حبك
من ملذاتى
وإنك قوية ع اللي
يدوب في دباديبك
وانا وهبنا لعشقك
عمرنا الآتي
وحياة حبايبك يا مصر
تحسي بوجودى
وتحسي إن مقامك
بعد معبودى
ربي وربك ورب الكون
ده واللي فيه
يا مورثانى في جنبات
الطين ده توحيدى
أدعي عليكي تعلي
ولا أدعيلك
تسقسنى ميه
ودمى يشربوا نيلك
واتمشى حافي في طينك
لاجل ما يلاقوا
DNA اللي فيه
هو تحليلك
ويلاقوا جسمى في نخله
بتطرح م البلح أمهات
من اللي شاربه
مع الميه تراتيلك
أعجب ما فيه إنى شايفك
من زمن تانى
زمن نجنى عليه فيه
ولا جانى
زمن يحسبه ملامحك
فيه مجانى
وتبقي فيه
وتبت فيكى باسنانى
تقولي أهلك
تقولي زى ما تقولي
ما أنا اللي لما باعوكي
وقعت من طولي
من يومها مهما يحاولوا
يقوموا فيّه
يلاقوا صورتك
في وشي
وعقلي ف ذهولي
بانده عليكى يا حلوة
بعوم ما فيّه
ياللي هواكى اتخلق
قبل الزمن ليا
نظرة لمتيم بحبك
كله حنيه
يشوف بك اللي في دنيا
الخلق ما نشافش
تعود له نفسه
وروحه بقرحه مصرية
*******
صدقينى مش بكينا
ياللي من حبك قرفنا
بعد ما قالوا خلاص
الموجه عدت
واتنصفنا
اتخطفنا
وابتدت بينا حروبنا
بعد ما قلنا خلاص
ع حبك المجنون ده تعرينا
بعد ما اتعرينا لاجل
نغطى عوراتك بتوبنا
بعد ما ف حضنك
شعرنا بقسوة الوحدة
اغتربنا
بعد ما ضحى بنفسه
لاجل ما يغيبك
شبابنا
بعد ما عرفنا أخيراً
إننا كنا الضحية
للي مش عامل حسابنا
بعد ما دقنا في احضانك عذابنا
بعد ما حرقوا ولاة الأمر
بالزيف كتابنا
بعد ما اكلوا
من التورته شبابنا
واللي نابنا
رغم كل اللي احنا
وارثينه يا طاهرة
من عيونا
لسه بتحبك قلوبنا شعر
محمد أبو عصفور